Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. flammeolo Tyriusque palam genialis in hortis
  2. sternitur et ritu decies centena dabuntur
  3. antiquo, veniet cum signatoribus auspex.
  4. haec tu secreta et paucis commissa putabas?
  5. non nisi legitime vult nubere, quid placeat dic:
  6. ni parere velis, pereundum erit ante lucernas;
  7. si scelus admittas, dabitur mora parvula, dum res
  8. nota urbi et populo contingat principis aurem,
  9. dedecus ille domus sciet ultimus; interea tu
  10. obsequere imperio, si tanti vita dierum
  11. paucorum, quidquid levius meliusve putaris,
  12. praebenda est gladio pulchra haec et candida cervix.
  13. Nil ergo optabunt homines? si consilium vis,
  14. permittes ipsis expendere numinibus quid
  15. conveniat nobis rebusque sit utile nostris,
  16. nam pro iucundis aptissima quaeque dabunt di:
  17. carior est illis homo quam sibi. nos animorum
  18. inpulsu et caeca magnaque cupidine ducti
  19. coniugium petimus partumque uxoris; at illis
  20. notum qui pueri qualisque futura sit uxor.