Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. tam patiens urbis, tam ferreus, ut teneat se,
  2. causidici nova cum veniat lectica Mathonis
  3. plena ipso, post hunc magni delator amici
  4. et cito rapturus de nobilitate comesa
  5. quod superest, quem Massa timet, quem munere palpat[*](palpat is omitted by P.)
  6. Carus et a trepido Thymele summissa Latino?
  7. cum te summoveant qui testamenta merentur
  8. noctibus,[*](noctibus Vind. Ψ : non tibi P.) in caelum quos evenit optima summi
  9. nunc via processus, vetulae vesica beatae?
  10. unciolam Proculeius habet, sed Gillo deuncem,
  11. partes quisque suas ad mensuram inguinis heres,
  12. accipiat sane mercedem sanguinis, et sic
  13. palleat ut nudis pressit qui calcibus anguem
  14. aut Lugudunensem rhetor dicturus ad aram.
  15. Quid referam quanta siccum iecur ardeat ira,
  16. cum populum gregibus comitum premit hic spoliator
  17. pupilli prostantis et hic damnatus inani
  18. iudicio? quid enim salvis infamia nummis?
  19. exul ab octava Marius bibit et fruitur dis
  20. iratis, at tu victrix provincia ploras.