Priapeia

Priaepia

Poeta Latini minores, ed. Aemilius Baehrens, Leipzig, Teubner, 1879

  1. nec sum grandine uerberata dura,
  2. nec gemmas modo germine exeuntes
  3. seri frigoris ustulauit aura,
  4. nec uenti pluuiaeue siccitasue,
  5. quod de se quererer, malum dederunt;
  6. non sturnus mihi graculusue raptor
  7. aut cornix anus aut aquosus anser
  8. aut coruus nocuit siticulosus:
  9. sed quod carmina pessimi poetae
  10. ramis sustineo laboriosis.
  1. Securi dormite, canes: custodiet hortum
  2. cum sibi dilecta Sirius Erigone.
  1. Parum est quod, hic ut fiximus semel sedem,
  2. agente terra per caniculam rimas
  3. siticulosam sustinemus aestatem;
  4. parum, quod imos perfluunt sinus imbres
  5. et in capillos grandines cadunt nostros
  6. rigetque dura barba uincta crystallo;
  7. parum, quod acta sub laboribus luce
  8. parem diebus peruigil traho noctem.