Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. tristius an miseris superest mare? linquite, terrae,
  2. spem pelagi[*](pelagi S, pelagis V ) sacrosque iterum seponite fluctus.'
  3. haec iterant segni flentes occumbere leto.
  4. magnanimus spectat pharetras et inutile robur
  5. Amphitryoniades; miscent suprema paventes
  6. verba alii iunguntque manus atque ora fatigant
  7. aspectu in misero toti,[*](toti Beck, tota V, in C hic ordo tota in misero) cum protinus alnus
  8. solvitur et vasto puppis mare sorbet hiatu.
  9. illam huc atque illuc nunc torquens verberat Eurus,[*](eurus X 2 >ut vid., M, euros V )
  10. nunc stridens Zephyris aufert Notus; undique fervent
  11. aequora, cum subitus trifida Neptunus in hasta
  12. caeruleum fundo caput extulit. 'hanc mihi Pallas
  13. et soror hanc' inquit 'mulcens mea pectora fletu
  14. abstulerint; veniant Phariae Tyriaeque carinae
  15. permissumque putent. quotiens mox rapta videbo
  16. vela Notis plenasque malis clamoribus undas.
  17. non meus Orion aut saevus Pliade Taurus
  18. mortis causa novae. miseris tu gentibus, Argo,[*](argo X 2 N, ergo V )
  19. fata paras, nec iam[*](iam T, tam V ) merito tibi, Tiphy, quietum
  20. ulla parens volet Elysium manesque piorum.'