Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ergo et Thessalici coniunx pensare mariti
  2. funus et immitem potuit Styga vincere supplex
  3. Thracius? hoc quanto melius pro patre liceret!
  4. non totus rapiere tamen, nec funera mittam
  5. longius; hic manes, hic intra tecta tenebo:
  6. tu custos dominusque laris, tibi cuncta tuorum
  7. parebunt; ego rite minor semperque secundus
  8. assiduas libabo dapes et pocula sacris
  9. manibus effigiesque colam; te lucida saxa,
  10. te similem doctae referet mihi linea cerae,
  11. nunc ebur et fulvum vultus mutabitur aurum,
  12. inde viam morum longaeque examina vitae
  13. adfatusque pios monituraque somnia poscam.’
  14. Talia dicentem genitor dulcedine laeta
  15. audit et immites lente descendit ad umbras
  16. verbaque dilectae fert narraturus Etruscae.
  17. Salve supremum, senior mitissime patrum,
  18. supremumque vale, qui numquam sospite nato
  19. triste chaos maestique situs patiere sepulcri.
  20. semper odoratis spirabunt floribus arae,