Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. non ego laudandus, sed sunt tua pectora, lacte
  2. et non calcata candidiora nive:
  3. mirarisque alios, cum sis mirabilis ipse,
  4. nec lateant artes eloquiumque tuum.
  5. te iuvenum princeps, cui dat Germania nomen,
  6. participem studii Caesar habere solet.
  7. tu comes antiquus, tu primis iunctus ab annis
  8. ingenio mores aequiperante places.
  9. te dicente prius fit protinus impetus illi:
  10. teque habet elicias qui sua verba tuis.
  11. cum tu desisti mortaliaque ora quierunt
  12. tectaque non longa continuere mora,
  13. surgit Iuleo iuvenis cognomine dignus,
  14. qualis ab Eois Lucifer ortus aquis.
  15. dumque silens adstat, status est vultusque diserti,
  16. spemque decens doctae vocis amictus [*](amicus corr. Heinsius) habet,
  17. mox, ubi pulsa mora est atque os caeleste solutum,
  18. hoc superos iures more solere loqui,
  19. atque "haec est " dicas "facundia principe digna
  20. "eloquio tantum nobilitatis inest.