Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. inque Propontiacis haerentem Cyzicon oris,
  2. Cyzicon, Haemoniae nobile gentis opus,
  3. quaeque tenent Ponti Byzantia litora fauces:
  4. hic locus est gemini ianua vasta maris.
  5. haec, precor, evincat, propulsaque fortibus Austris
  6. transeat instabilis strenua Cyaneas
  7. Thyniacosque sinus, et ab his per Apollinis urbem arta [*](apta vel alta vel vecta: arta σ )
  8. sub Anchiali moenia tendat iter.
  9. inde Mesembriacos portus et Odeson et arces
  10. praetereat dictas nomine, Bacche, tuo,
  11. et quos Alcathoi memorant e moenibus ortos
  12. sedibus his profugos constituisse Larem,
  13. a quibus adveniat Miletida sospes ad urbem,
  14. offensi quo me detulit ira dei.
  15. haec si contigerint, meritae cadet agna Minervae:
  16. non facit ad nostras hostia maior opes.
  17. vos quoque, Tyndaridae, quos haec colit insula, fratres,
  18. mite precor duplici numen adesse [*](adeste) viae!
  19. altera namque parat Symplegadas ire per artas,
  20. scindere Bistonias altera puppis aquas.