Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. et secum ambages caecaque iussa refert,
  2. expedit errantem nemori gratissima coniunx
  3. et dixit gravidae posceris exta bovis.
  4. exta bovis gravidae dantur, fecundior annus
  5. provenit, et fructum terra pecusque ferunt,
  6. hanc quondam Cytherea diem properantius ire
  7. iussit et admissos praecipitavit equos,
  8. ut titulum imperii quam primum luce sequenti
  9. Augusto iuveni prospera bella darent. [*](17. CN LVDI 18. DN LVDI)
  10. Sed iam praeteritas quartus tibi Lucifer Idus
  11. respicit: hac Hyades Dorida nocte tenent. [*](19. E CER — N LVD — IN — CIR)
  12. Tertia post Hyadas cum lux erit orta remotas
  13. carcere partitos Circus habebit equos,
  14. cur igitur missae vinctis ardentia taedis
  15. terga ferant volpes, causa docenda mihi est.
  16. frigida Carseolis nec olivis apta ferendis
  17. terra, sed ad segetes ingeniosus ager;
  18. hac ego Pelignos, natalia rura, petebam,
  19. parva, sed assiduis uvida semper aquis.
  20. hospitis antiqui solitas intravimus aedes;