Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. immolat hunc Briareus facta ex adamante securi,
  2. et iam iam flammis exta daturus erat:
  3. Iuppiter alitibus rapere imperat: attulit illi
  4. miluus et meritis venit in astra suis.
    5. [*](18. EC 19. F QVIN. N 20. GC 21. HC 22. AN)
  5. Una dies media est, et fiunt sacra Minervae,
  6. nomina quae iunctis quinque diebus habent,
  7. sanguine prima vacat, nec fas concurrere ferro:
  8. causa, quod est illa nata Minerva die.
  9. altera tresque super strata celebrantur harena:
  10. ensibus exertis bellica laeta dea est.
  11. Pallada nunc pueri teneraeque orate puellae:
  12. qui bene placarit Pallada, doctus erit.
  13. Pallade placata lanam mollire puellae
  14. discant et plenas exonerare colos.
  15. illa etiam stantis radio percurrere telas
  16. erudit et rarum pectine denset opus.
  17. hanc cole, qui maculas laesis de vestibus aufers,
  18. hanc cole, velleribus quisquis aena paras;
  19. nec quisquam invita faciet bene vincula plantae
  20. Pallade, sit Tychio doctior ille licet;