Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. hic latet Hippolytus loris direptus equorum,
  2. unde nemus nullis illud aditur equis.
  3. licia dependent longas velantia saepes,
  4. et posita est meritae multa tabella deae.
  5. saepe potens voti, frontem redimita coronis,
  6. femina lucentes portat ab urbe faces.
  7. regna tenent fortes manibus pedibusque fugaces,
  8. et perit exemplo postmodo quisque suo.
  9. defluit incerto lapidosus murmure rivus:
  10. saepe, sed exiguis haustibus, inde bibi.
  11. Egeria est, quae praebet aquas, dea grata Camenis;
  12. illa Numae coniunx consiliumque fuit.
  13. principio nimium promptos ad bella Quirites
  14. molliri placuit iure deumque metu;
  15. inde datae leges, ne firmior omnia posset,
  16. coeptaque sunt pure tradita sacra coli.
  17. exuitur feritas, armisque potentius aequum est,
  18. et cum cive pudet conseruisse manus;
  19. atque aliquis, modo trux, visa iam vertitur ara
  20. vinaque dat tepidis farraque salsa focis.