Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. dent tibi caelestes, quos tu caelestibus, annos,
  2. proque tua maneant in statione domo!
  3. tunc quoque vicini lucus celebratur Helerni,1
  4. qua petit aequoreas advena Thybris aquas.
  5. ad penetrale Numae Capitoliumque Tonantem
  6. inque Iovis summa caeditur arce bidens.
  7. saepe graves pluvias adopertus nubibus auster
  8. concitat, aut posita sub nive terra latet.
    9. [*](2. AN 3. BN)
  9. Proximus Hesperias Titan abiturus in undas
  10. gemmea purpureis cum iuga demet equis,
  11. illa nocte aliquis tollens ad sidera voltum
  12. dicet ubi est hodie quae Lyra fulsit heri?
  13. dumque Lyram quaeret, medii quoque terga Leonis
  14. in liquidas subito mersa notabit aquas.
    15. [*](4. CN)
  15. Quem modo caelatum stellis Delphina videbas,
  16. is fugiet visus nocte sequente tuos:
  17. seu fuit occultis felix in amoribus index,
  18. Lesbida cum domino seu tulit ille lyram.
  19. quod mare non novit, quae nescit Ariona tellus?
  20. carmine currentes ille tenebat aquas.