Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. vagierunt ambo pariter: sensisse putares,
  2. hi redeunt udis in sua tecta genis,
  3. sustinet impositos summa cavus alveus unda:
  4. heu quantum fati parva tabella tulit!
  5. alveus in limo silvis adpulsus opacis
  6. paulatim fluvio deficiente sedet.
  7. arbor erat: remanent vestigia, quaeque vocatur
  8. Rumina nunc ficus, Romula ficus erat.
  9. venit ad expositos (mirum!) lupa feta gemellos:
  10. quis credat pueris non nocuisse feram?
  11. non nocuisse parum est, prodest quoque: quos lupa nutrit,
  12. perdere cognatae sustinuere manus,
  13. constitit et cauda teneris blanditur alumnis
  14. et fingit lingua corpora bina sua.
  15. Marte satos scires: timor afuit, ubera ducunt
  16. nec sibi promissi lactis aluntur ope.
  17. illa loco nomen fecit, locus ipse Lupercis.
  18. magna dati nutrix praemia lactis habet,
  19. quid vetat Arcadio dictos a monte Lupercos?
  20. Faunus in Arcadia templa Lycaeus habet.