Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. Romulus et frater pastoralisque iuventus
  2. solibus et campo corpora nuda dabant;
  3. caestibus et iaculis et misso pondere saxi
  4. brachia per lusus experienda dabant:
  5. pastor ab excelso ‘per devia rura iuvencos,
  6. Romule, praedones, et Reme,’ dixit agunt.
  7. longum erat armari: diversis exit uterque
  8. partibus; occursu praeda recepta Remi.
  9. ut rediit, veribus stridentia detrahit exta
  10. atque ait haec certe non nisi victor edet.
  11. dicta facit Fabiique simul, venit inritus illuc
  12. Romulus et mensas ossaque nuda videt;
  13. risit et indoluit Fabios potuisse Remumque
  14. vincere, Quintilios non potuisse suos.
  15. fama manet facti: posito velamine currunt,
  16. et memorem famam, quod bene cessit, habet,
  17. forsitan et quaeras, cur sit locus ille Lupercal,
  18. quaeve diem tali nomine causa notet.
  19. Silvia Vestalis caelestia semina partu
  20. ediderat patruo regna tenente suo.