Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. bella canit superum, falsoque in honore Gigantas
  2. ponit et extenuat magnorum facta deorum;
  3. emissumque ima de sede Typhoea terrae
  4. caelitibus fecisse metum cunctosque dedisse
  5. terga fugae, donec fessos Aegyptia tellus
  6. ceperit et septem discretus in ostia Nilus.
  7. Huc quoque terrigenam venisse Typhoea narrat
  8. et se mentitis superos celasse figuris;
  9. “duxque gregis” dixit “fit Iuppiter; unde recurvis
  10. nunc quoque formatus Libys est cum cornibus Ammon.
  11. Delius in corvo, proles Semeleia capro,
  12. fele soror Phoebi, nivea Saturnia vacca,
  13. pisce Venus latuit, Cyllenius ibidis alis.”
  14. Hactenus ad citharam vocalia moverat ora:
  15. poscimur Aonides. Sed forsitan otia non sint,
  16. nec nostris praebere vacet tibi cantibus aures.”
  17. “Ne dubita, vestrumque mihi refer ordine carmen”
  18. Pallas ait nemorisque levi consedit in umbra.