Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Proximus Ausonias iniusti miles Amuli
  2. rexit opes, Numitorque senex amissa nepotis
  3. munere regna capit, festisque Palilibus urbis
  4. moenia conduntur, Tatiusque patresque Sabini
  5. bella gerunt, arcisque via Tarpeia reclusa
  6. dignam animam poena congestis exuit armis.
  7. Inde sati Curibus tacitorum more luporum
  8. ore premunt voces et corpora victa sopore
  9. invadunt portasque petunt, quas obice firmo
  10. clauserat Iliades: unam tamen ipsa reclusit
  11. nec strepitum verso Saturnia cardine fecit.
  12. Sola Venus portae cecidisse repagula sensit
  13. et clausura fuit, nisi quod rescindere numquam
  14. dis licet acta deum. Iano loca iuncta tenebant
  15. naides Ausoniae gelido rorantia fonte:
  16. has rogat auxilium, nec nymphae iusta petentem
  17. sustinuere deam venasque et flumina fontis
  18. elicuere sui; nondum tamen invia Iani
  19. ora patentis erant, neque iter praecluserat unda:
  20. lurida supponunt fecundo sulphura fonti