Ars Amatoria

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Carpe cibos digitis: est quiddam gestus edendi:
  2. Ora nec immunda tota perungue manu.
  3. Neve domi praesume dapes, sed desine citra
  4. Quam capis; es paulo quam potes esse minus;
  5. Priamides Helenen avide si spectet edentem,
  6. Oderit, et dicat 'stulta rapina mea est.'
  7. Aptius est, deceatque magis potare puellas:
  8. Cum Veneris puero non male, Bacche, facis.
  9. Hoc quoque, qua patiens caput est, animusque pedesque
  10. Constant: nec, quae sunt singula, bina vide.
  11. Turpe iacens mulier multo madefacta Lyaeo:
  12. Digna est concubitus quoslibet illa pati.
  13. Nec somnis posita tutum succumbere mensa:
  14. Per somnos fieri multa pudenda solent.
  15. Ulteriora pudet docuisse: sed alma Dione
  16. 'Praecipue nostrum est, quod pudet' inquit 'opus.'
  17. Nota sibi sit quaeque: modos a corpore certos
  18. Sumite: non omnes una figura decet.
  19. Quae facie praesignis erit, resupina iaceto:
  20. Spectentur tergo, quis sua terga placent.