Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. desertosque videt portus classemque relictam.
  2. At procul in sola secretae Troades acta
  3. amissum Anchisen flebant, cunctaeque profundum
  4. pontum adspectabant flentes. Heu tot vada fessis
  5. et tantum superesse maris! vox omnibus una.
  6. Urbem orant; taedet pelagi perferre laborem.
  7. Ergo inter medias sese haud ignara nocendi
  8. conicit, et faciemque deae vestemque reponit;
  9. fit Beroë, Tmarii coniunx longaeva Dorycli,
  10. cui genus et quondam nomen natique fuissent;
  11. ac sic Dardanidum mediam se matribus infert:
  12. O miserae, quas non manus inquit Achaïca bello
  13. traxerit ad letum patriae sub moenibus! O gens
  14. infelix, cui te exitio Fortuna reservat?
  15. Septuma post Troiae exscidium iam vertitur aestas,
  16. cum freta, cum terras omnes, tot inhospita saxa
  17. sideraque emensae ferimur, dum per mare magnum
  18. Italiam sequimur fugientem, et volvimur undis.
  19. Hic Erycis fines fraterni, atque hospes Acestes:
  20. quis prohibet muros iacere et dare civibus urbem?