Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. altera Tarpeios est inter Teia lucos,
  2. candida, sed potae non satis unus erit.
  3. his ego constitui noctem lenire uocatis,
  4. et Venere ignota furta nouare mea.
  5. unus erat tribus in secreta lectulus herba.
  6. quaeris concubitus? inter utramque fui.
  7. Lygdamus ad cyathos, uitrique aestiua supellex
  8. et Methymnaei Graeca saliua meri.
  9. Nile, tuus tibicen erat, crotalistria phillis,
  10. haec facilis spargi munda sine arte rosa,
  11. nanus et ipse suos breuiter concretus in artus
  12. iactabat truncas ad caua buxa manus.
  13. sed neque suppletis constabat flamma lucernis,
  14. reccidit inque suos mensa supina pedes.
  15. me quoque per talos Venerem quaerente secundos
  16. semper damnosi subsiluere canes.
  17. cantabant surdo, nudabant pectora caeco:
  18. Lanuuii ad portas, ei mihi, s eram;
  19. cum subito rauci sonuerunt cardine postes,
  20. et leuia ad primos murmura facta Laris.