Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ille sibi admotas a uirgine corripit escas:
  2. uirginis in palmis ipsa canistra tremunt.
  3. si fuerint castae, redeunt in colla parentum,
  4. clamantque agricolae fertilis annus erit.
  5. huc mea detonsis auecta est Cynthia mannis:
  6. causa fuit Iuno, sed mage causa Venus.
  7. Appia, dic quaeso, quantum te teste triumphum
  8. egerit effusis per tua saxa rotis!
  9. turpis in arcana sonuit cum rixa taberna;
  10. si sine me, famae non sine labe meae.
  11. spectaclum ipsa sedens primo temone pependit,
  12. ausa per impuros frena mouere locos.
  13. serica nam taceo uulsi carpenta nepotis
  14. atque armillatos colla Molossa canis,
  15. qui dabit immundae uenalia fata saginae,
  16. uincet ubi erasas barba pudenda genas.
  17. cum fieret nostro totiens iniuria lecto,
  18. mutato uolui castra mouere toro.
  19. Phyllis Auentinae quaedam est uicina Dianae,
  20. sobria grata parum: cum bibit, omne decet.