Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. hinc Augusta ratis plenis Iouis omine uelis,
  2. signaque iam Patriae uincere docta suae.
  3. tandem aciem geminos Nereus lunarat in arcus,
  4. armorum et radiis picta tremebat aqua,
  5. cum Phoebus linquens stantem se uindice Delon
  6. (nam tulit iratos mobilis una Notos)
  7. astitit Augusti puppim super, et noua flamma
  8. luxit in obliquam ter sinuata facem.
  9. non ille attulerat crinis in colla tos
  10. aut testudineae carmen inerme lyrae,
  11. sed quali aspexit Pelopeum Agamemnona uultu,
  12. egessitque auidis Dorica castra rogis,
  13. aut qualis flexos it Pythona per orbis
  14. serpentem, imbelles quem timuere lyrae.
  15. mox ait ‘o Longa mundi seruator ab Alba,
  16. Auguste, Hectoreis cognite maior auis,
  17. uince mari: iam terra tua est: tibi militat arcus
  18. et fauet ex umeris hoc onus omne meis.
  19. e metu patriam, quae nunc te uindice freta
  20. imposuit prorae publica uota tuae.