Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. quin etiam, si me ulterius provexerit ira,
  2. ostendes matri bracchia laesa tuae.
  3. necdum inclinatae prohibent te ludere mammae:
  4. viderit haec, si quam iam peperisse pudet.
  5. dum nos fata sinunt, oculos satiemus amore:
  6. nox tibi longa venit, nec reditura dies.
  7. atque utinam haerentis sic nos vincire catena
  8. velles, ut numquam solveret ulla dies!
  9. exemplo iunctae tibi sint in amore columbae,
  10. masculus et totum femina coniugium.
  11. errat, qui finem vesani quaerit amoris:
  12. verus amor nullum novit habere modum.