Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. Quae fueram magnis olim patefacta triumphis,
  2. ianua Patriciae vota Pudicitiae,
  3. cuius inaurati celebrarunt limina currus,
  4. captorum lacrimis umida supplicibus,
  5. nunc ego, nocturnis potorum saucia rixis,
  6. pulsata indignis saepe queror manibus,
  7. et mihi non desunt turpes pendere corollae
  8. semper et exclusi signa iacere faces.
  9. nec possum infamis dominae defendere voces,
  10. nobilis obscenis tradita carminibus;
  11. nec tamen illa suae revocatur parcere famae,
  12. turpior et saecli vivere luxuria.
  13. has inter gravius cogor deflere querelas,
  14. supplicis a longis tristior excubiis.
  15. ille meos numquam patitur requiescere postes,
  16. arguta referens carmina blanditia:
  17. 'ianua vel domina penitus crudelior ipsa,
  18. quid mihi tam duris clausa taces foribus?
  19. cur numquam reserata meos admittis amores,
  20. nescia furtivas reddere mota preces?