Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. haec non sum rumore malo, non augure doctus;
  2. vidi ego: me quaeso teste negare potes?
  3. vidi ego te toto vinctum languescere collo
  4. et flere iniectis, Galle, diu manibus,
  5. et cupere optatis animam deponere labris,
  6. et quae deinde meus celat, amice, pudor.
  7. non ego complexus potui diducere vestros:
  8. tantus erat demens inter utrosque furor.
  9. non sic Haemonio Salmonida mixtus Enipeo
  10. Taenarius facili pressit amore deus,
  11. nec sic caelestem flagrans amor Herculis Heben
  12. sensit ab Oetaeis gaudia prima rogis.