Fall of Troy

Quintus Smyrnaeus

Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.

  1. εἴ που ἐνὶ ξυλόχοισιν ὁμήθεα ταῦρον ἴδοιτο·
  2. ὣς ἡ ῥίμφα θέουσα διήνυε μακρὰ κέλευθα
  3. διζομένη τάχα ποσσὶ πυρῆς ἐπιβήμεναι αἰνῆς.
  4. οὐδέ τί οἱ κάμε γούνατʼ· ἐλαφρότεροι δʼ ἐφέροντο
  5. ἐσσυμένης πόδες αἰέν· ἔπειγε γὰρ οὐλομένη Κὴρ
  6. καὶ Κύπρις· οὐδέ τι θῆρας ἐδείδιε λαχνήεντας
  7. ἀντομένους ὑπὸ νύκτα, πάρος μέγα πεφρικυῖα·
  8. πᾶσα δέ οἱ λασίων ὀρέων ἐστείβετο πέτρη
  9. καὶ κρημνοί, πᾶσαι δὲ διεπρήσσοντο χαράδραι.
  10. τὴν δέ που εἰσορόωσα τόθʼ ὑψόθι δῖα Σελήνη
  11. μνησαμένη κατὰ θυμὸν ἀμύμονος Ἐνδυμίωνος
  12. πολλὰ μάλʼ ἐσσυμένην ὀλοφύρατο· καί οἱ ὕπερθε
  13. λαμπρὸν παμφανόωσα μακρὰς ἀνέφαινε κελεύθους.
  14. ἵκετο δʼ ἐμβεβαυῖα διʼ οὔρεος, ᾗχι καὶ ἄλλαι
  15. νύμφαι Ἀλεξάνδροιο πυρὴν περικωκύεσκον.