Dionysiaca

Nonnus of Panopolis

Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.

  1. Ἐλπὶς ὅλου βιότοιο, παραίφασις ἀφρογενείης,
  2. νηλειὴς ἐμὰ τέκνα βιήσατο μοῦνα Κρονίων·
  3. ἐννέα γὰρ πλήσασα μογοστόκα κύκλα Σελήνης
  4. δριμὺ βέλος μεθέπουσα δυηπαθέος τοκετοῖο
  5. Ἁρμονίην ἐλόχευσα, καὶ ἄλγεα ποικίλα πάσχει
  6. ἀχνυμένη· κούρην δὲ μογοστόκον ἔλλαχε Λητώ,
  7. Ἄρτεμιν Εἰλείθυιαν, ἀρηγόνα θηλυτεράων.
  8. τέκνον Ἀμυμώνης ὁμογάστριον, οὔ σε διδάξω,
  9. ὡς λάχον ἐξ ἁλὸς αἷμα καὶ αἰθέρος· ἀλλὰ τελέσσαι
  10. ἤθελον ἄξιον ἔργον, ὅπως παρὰ μητρὶ θαλάσσῃ
  11. οὐρανόθεν γεγαυῖα καὶ οὐρανὸν ἐν χθονὶ πήξω·
  12. ἀλλὰ κασιγνήτης ἐπὶ κάλλεϊ σεῖο--- τιταίνων
  13. θέλγε θεούς, καὶ μᾶλλον ἴσον βέλος εἰν ἑνὶ θεσμῷ
  14. πέμπε Ποσειδάωνι καὶ ἀμπελόεντι Λυαίῳ,
  15. ἀμφοτέροις μακάρεσσιν· ἐγὼ δέ σοι ἄξια μόχθων
  16. δῶρον ἑκηβολίης ἐπεοικότα μισθὸν ὀπάσσω·
  17. δώσω σοι χρυσέην γαμίην χέλυν, ἣν παρὰ παστῷ
  18. Ἁρμονίῃ πόρε Φοῖβος, ἐγὼ δέ σοι ἐγγυαλίξω
  19. ἄστεος ἐσσομένου μνημήιον, ὄφρά κεν εἴης
  20. καὶ μετὰ τοξευτῆρα λυροκτύπος, ὥς περ Ἀπόλλων.