Dionysiaca

Nonnus of Panopolis

Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.

  1. ἴθμασιν ἀσταθέεσσιν ἐτυμβεύοντο θαλάσσης·
  2. εἰ δέ τις εἰς ἅλα πῖπτε τυπεὶς Βρομίοιο μαχητής,
  3. αἰθύσσων παλάμας ἐπενήχετο κύματα τέμνων
  4. χερσὶ θαλασσομόθοισιν, ἁλιρροίζῳ δὲ κυδοιμῷ
  5. μαρνάμενος ῥοθίοισι μετʼ ἀνέρας ἔσχισεν ὕδωρ.
  6. εἰναλίης δὲ τάλαντα μάχης ἔκλινε Κρονίων,
  7. νίκην ὑδατόεσσαν ἐπεντύνων Διονύσῳ·
  8. καὶ βυθίῳ τριόδοντι κορύσσετο κυανοχαίτης
  9. μαρνάμενος δηίοισι, καὶ ἄβροχον ἡνιοχεύων
  10. ἅρμα Ποσειδάωνος ἐβακχεύθη Μελικέρτης.
  11. καὶ πισύραις κατὰ πόντον ἐφιππεύοντες ἀέλλαις
  12. κύματα πυργώσαντες ἐθωρήχθησαν ἀῆται,
  13. δυσμενέων ἐθέλοντες ἀιστῶσαι στίχα νηῶν,
  14. οἱ μὲν Δηριαδῆος ἀρηγόνες, οἱ δὲ Λυαίου·
  15. καὶ Ζέφυρος κεκόρυστο, Νότος δʼ ἐπεσύρισεν Εὔρῳ,
  16. καὶ Βορέης Θρήισσαν ἄγων ἀντίπνοον αὔρην
  17. ἄγρια μαινομένης ἐπεμάστιε νῶτα θαλάσσης.
  18. καὶ στόλον ἰθύνουσα μαχήμονα Δηριαδῆος
  19. ὑσμίνης Ἔρις ἦρχε· Διωνύσοιο δὲ νηῶν
  20. Ἰνδοφόνῳ παλάμῃ κολπώσατο λαίφεα Νίκη.