Dionysiaca

Nonnus of Panopolis

Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.

  1. Ἁδρυάδες δʼ ἀλάλαζον, ἐπʼ εὐπετάλοιο δὲ Νύμφη
  2. ἡμιφανὴς ἤειδεν ὑπερκύψασα κορύμβου.
  3. Χιονέῳ δὲ γάλακτι χυτὴ λευκαίνετο πηγή,
  4. ὑδρηλή περ ἐοῦσα, χαραδραίῳ δʼ ἐνὶ κόλπῳ
  5. νηιάδες λούσατο γαλαξαίοισι ῥεέθροις,
  6. καὶ γάλα λευκὸν ἔπινον· ἐρευθιόωντι δὲ μαζῷ
  7. οἶνον ἐρευγομένη κραναὴ πορφύρετο πέτρη,
  8. γλεῦκος ἀμοσχεύτοιο διαβλύζουσα κολώνης
  9. ἡδυπότοις λιβάδεσσι· καὶ αὐτοχύτων ἀπὸ κόλπων
  10. λαρὰ μελιρραθάμιγγος ἐλείβετο δῶρα μελίσσης,
  11. σίμβλων οὐ χατέοντα· καὶ ἀρτιτόκων ἀπὸ θάμνων
  12. ἄγχνοον ὀξυέθειρος ἀνέδραμε μῆλον ἀκάνθης·
  13. αὐτομάτου δὲ χυθέντος ἐπʼ ἀκρεμόνεσσιν ἐλαίου
  14. ἰκμάσιν ἀθλιβέεσσιν ἐλούετο δένδρον Ἀθήνης.
  15. καὶ κύνας ὀρχηστῆρας ἐπηχύνοντο λαγωοί·
  16. μηκεδανοὶ δὲ δράκοντες ἐβακχεύοντο χορείῃ
  17. ἴχνια λιχμώοντες ἐχιδνοκόμου Διονύσου,
  18. αὐχένα δοχμώσαντες, ἀνήρυγε δʼ ἄλλος ἐπʼ ἄλλῳ
  19. μειλίχιον σύριγμα γεγηθότος ἀνθερεῶνος·
  20. τερπομένου δὲ δράκοντος ἔην τότε ῥυθμὸς ἐχέφρων,