Cynegetica

Oppian of Apamea

Oppian of Apamea. Cynegetica. Mair, A. W., editor. London, William Heinemann, Ltd.; New York: G.P. Putnam's Sons. 1928.

  1. πόρδαλις οἶδʼ ὀλοὴ παλαμάων λοίγιον ἰόν,
  2. καὶ σθένος αἰνὸς ὄϊς μέγα λαϊνέοιο μετώπου,
  3. καὶ κάπρος μένος οἶδεν ἑῶν ὑπέροπλον ὀδόντων.
  4. ὅσσαι μέν νυν ἔασιν ἐπακτήρεσσι δαφοινοῖς
  5. μουναδὸν ἐν σκοπέλοισι προμήθειαί τε πάγαι τε,
  6. κεκριμένας φράσομεν θήρας ἐπὶ θηρσὶν ἑκάστοις·
  7. ξυνὰ δέ θʼ ὅσσα πέλουσιν, ὁμοίης ἔλλαχεν ᾠδῆς.
  8. ξυνὰ θηροσύναι τε λίνων ξυναί τε ποδάγραι·
  9. ξυνὰ δέ τʼ ἀνθρώποισι ποδωκέα πάντα γένεθλα
  10. ἵπποις ἠδὲ κύνεσσι διωκέμεν· ἄλλοτε δʼ αὖτε
  11. καὶ μούνοις ἵπποισι κυνῶν ἄτερ ἰθὺς ἐλαύνειν·
  12. ἵπποισιν κείνοισιν, ὅσοι περὶ Μαυρίδα γαῖαν
  13. φέρβοντʼ, ἢ Λιβύεσσιν· ὅσοι μὴ κάρτεϊ χειρῶν
  14. ἄγχονται ψαλίοισι βιαζομένοιο χαλινοῦ,
  15. πείθονται δὲ λύγοισιν, ὅπη βροτὸς ἡγεμονεύει.
  16. τοὔνεκεν ἱππελάται κείνων ἐπιβήτορες ἵππων
  17. ἠδὲ κύνας λείπουσι φίλους πίσυνοί τʼ ἐλόωσιν
  18. ἵπποις ἠελίου τε βολῇ καὶ νόσφιν ἀρωγῶν.
  19. ξυνὸν ἀκοντίζειν δὲ καὶ ἀντία τοξάζεσθαι
  20. θῆρας ἀρειοτέρους, τοί τʼ ἀνδράσιν ἶφι μάχονται.