Iliad

Homer

Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.

  1. αὐτὰρ ἐπεὶ παύσαντο πόνου τετύκοντό τε δαῖτα
  2. δαίνυντʼ, οὐδέ τι θυμὸς ἐδεύετο δαιτὸς ἐΐσης.
  3. αὐτὰρ ἐπεὶ πόσιος καὶ ἐδητύος ἐξ ἔρον ἕντο,
  4. τοῖς ἄρα μύθων ἦρχε Γερήνιος ἱππότα Νέστωρ·
  5. Ἀτρεΐδη κύδιστε ἄναξ ἀνδρῶν Ἀγάμεμνον,
  6. μηκέτι νῦν δήθʼ αὖθι λεγώμεθα, μηδʼ ἔτι δηρὸν
  7. ἀμβαλλώμεθα ἔργον ὃ δὴ θεὸς ἐγγυαλίζει.
  8. ἀλλʼ ἄγε κήρυκες μὲν Ἀχαιῶν χαλκοχιτώνων
  9. λαὸν κηρύσσοντες ἀγειρόντων κατὰ νῆας,
  10. ἡμεῖς δʼ ἀθρόοι ὧδε κατὰ στρατὸν εὐρὺν Ἀχαιῶν
  11. ἴομεν ὄφρα κε θᾶσσον ἐγείρομεν ὀξὺν Ἄρηα.
  12. ὣς ἔφατʼ, οὐδʼ ἀπίθησεν ἄναξ ἀνδρῶν Ἀγαμέμνων.
  13. αὐτίκα κηρύκεσσι λιγυφθόγγοισι κέλευσε
  14. κηρύσσειν πόλεμον δὲ κάρη κομόωντας Ἀχαιούς·
  15. οἳ μὲν ἐκήρυσσον, τοὶ δʼ ἠγείροντο μάλʼ ὦκα.
  16. οἳ δʼ ἀμφʼ Ἀτρεΐωνα διοτρεφέες βασιλῆες
  17. θῦνον κρίνοντες, μετὰ δὲ γλαυκῶπις Ἀθήνη
  18. αἰγίδʼ ἔχουσʼ ἐρίτιμον ἀγήρων ἀθανάτην τε,
  19. τῆς ἑκατὸν θύσανοι παγχρύσεοι ἠερέθονται,
  20. πάντες ἐϋπλεκέες, ἑκατόμβοιος δὲ ἕκαστος·