History of the Peloponnesian War

Et nunc etiam propter antiquam hanc habitationem ipsa quoque urbis arx ab Atheniensibus urbs appellatur.

Athenienses igitur et'ante diu in agris suo jure ac liberi vivebant, et postquam in unam urbem contributi sunt, ob illum in agris agendi morem plerique tam priorum quam posteriorum ad hoc usque bellum cum tota familia in agris fuerant, et habitarant, eamque ob causam non facile migrabant, praesertim quum nuper demum post bellum Medicum suam supellectilem recepissent;

sed graviter et iniquo animo ferebant, quod et penates deseruissent et sacra, quae plane ipsis a pristino statu suae civitatis patria erant, et quod vitae genus essent mutaturi, et nihil aliud quam relinquerent suam quisque patriam.

Postquam autem in urbem advenerunt, exiguo quidem eorum numero domus fuerunt, et locus apud aliquos amicos vel necessarios, quo se reciperent, plerique vero deserta urbis loca habitarunt et templa et omnia heroum sacella, praeter arcem et Eleusinium, et si quid aliud bene clausum erat, et locus, qui Pelasgicum appellatur quod sub arcem est, et in quo ne habitaretur, dirae exsecrationes prohibebant et quoddam etiam oraculi Pythici carmen in extrema sui parte his verbis vetabat, « egisse Pelasgicon otia praestat, » tamen ob praesentem necessitatem habitatum est.

Et oraculum illud mihi videtur cecidisse contra, quam exspectabant; non enim propter impiam habitationem calamitates reipublicac videntur accidisse, sed propter bellum ipsa inhabitandi necessitas, quod quum oraculum non nominatim indicasset, praevidebat tamen, locum illum haud fauste aliquando habitatum iri.