In Eutropium

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. ignoscant senio, iuvenes ad proelia mittant; —
  2. qualis pauperibus nutrix invisa puellis
  3. adsidet et tela communem quaerere victum
  4. rauca monet; festis illae lusisse diebus
  5. orant et positis aequaevas visere pensis,
  6. irataeque operi iam lasso pollice fila
  7. turbant et teneros detergent stamine fletus.
  8. Emicat extemplo cunctis trepidantibus audax
  9. crassa mole Leo, quem vix Cyclopia solum
  10. aequatura fames, quem non ieiuna Celaeno
  11. vinceret; hinc nomen fertur meruisse Leonis.
  12. acer in absentes linguae iactator, abundans
  13. corporis exiguusque animi, doctissimus artis
  14. quondam lanificae, moderator pectinis unci,
  15. non alius lanam purgatis sordibus aeque
  16. praebuerit calathis, similis nec pinguia quisquam
  17. vellera per tenues ferri producere rimas.
  18. tunc Aiax erat Eutropii lateque fremebat,