de raptu Proserpinae

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. discolor et longa solitos caligine pasci
  2. terruit orbis equos ; pressis haesere lupatis
  3. attoniti meliore polo rursusque verendum
  4. in chaos obliquo certant temone reverti.
  5. mox ubi pulsato senserunt verbera tergo
  6. et solem didicere pati, torrentius amne
  7. hiberno tortaque ruunt pernicius hasta :
  8. quantum non iaculum Parthi, non impetus Austri,
  9. non leve sollicitae mentis discurrit acumen.
  10. sanguine frena calent ; corrumpit spiritus auras
  11. letifer ; infectae spumis vitiantur harenae.
  12. Diffugiunt Nymphae : rapitur Proserpina curru
  13. imploratque deas. iam Gorgonis ora revelat
  14. Pallas et intento festinat Delia telo
  15. nec patruo cedunt ; stimulat communis in arma
  16. virginitas crimenque feri raptoris acerbat.
  17. ille velut stabuli decus armentique iuvencam
  18. cum leo possedit nudataque viscera fodit
  19. unguibus et rabiem totos exegit in armos :
  20. stat crassa turpis sanie nodosque iubarum