de consulatu Stilichonis

Claudian

Claudian, Volume 1-2. Platnauer, Maurice, editor. Harvard University Press: Cambridge, MA; London, England, 1922.

  1. pertulit exilium; cum se promitteret alter
  2. exulis ultorem, iacuit mucrone suorum:
  3. res avidi concire novas odioque furentes
  4. pacis et ingenio scelerumque cupidine fratres.
  5. Post domitas Arctos alio prorupit ab axe
  6. tempestas et, ne qua tuis intacta tropaeis
  7. pars foret, Australis sonuit tuba, moverat omnes
  8. Maurorum Gildo populos, quibus inminet Atlas
  9. et quos interior nimio plaga sole relegat:
  10. quos vagus umectat Cinyps et proximus hortis
  11. Hesperidum Triton et Gir notissimus amnis
  12. Aethiopum, simili mentitus gurgite Nilum;
  13. venerat et parvis redimitus Nuba sagittis
  14. et velox Garamas, nec quamvis tristibus Hammon
  15. responsis alacrem potuit Nasamona morari.
  16. stipantur Numidae campi, stant pulvere Syrtes
  17. Gaetulae, Poenus iaculis obtexitur aer.
  18. hi virga moderantur equos; his fulva leones
  19. velamenta dabant ignotarumque ferarum
  20. exuviae, vastis Meroe quas nutrit harenis;