Eclogarum Liber

Ausonius, Decimus Magnus

Ausonius, Decimus Magnus. Ausonius, Volume 1. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1919.

  1. Vulcanique dies, autumni exordia primi,
  2. Quinquatrusque deae Pallados expediam
  3. et medias idus Mai Augustique recursu,
  4. quas sibi Mercurius quasque Diana dicat;
  5. matronae quae sacra colant pro laude virorum,
  6. Mavortis primi cum rediere dies.
  7. festa Caprotinis memorabo celebria nonis,
  8. cum stola matronis dempta teget famulas.
  9. quattuor illa etiam discretis partibus anni
  10. solstitia et luces nocte dieque pares,
  11. nec Regifugium pulsis ex urbe tyrannis
  12. laetum Romanis fas reticere diem.
  13. visne Opis ante sacrum vel Saturnalia dicam
  14. festaque servorum, cum famulantur eri?
  15. et numquam certis redeuntia festa diebus,
  16. compita per vicos cum sua quisque colit?