Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. aures pande deo. cecinit Cymaea per orbem
  2. haec olim uates et te praesaga tuosque
  3. uulgauit terris proauorum aetate furores.
  4. iamque alter tibi, nec perplexo carmine, coram
  5. fata cano uates: sistis ni crastina signa,
  6. firmabis nostro Phoebeae dicta Sibyllae
  7. sanguine. nec Graio posthac Diomede ferentur,
  8. sed te, si perstas, insignes consule campi.’
  9. haec Paulus, lacrimaeque oculis ardentibus ortae.
  10. Necnon et noctem sceleratus polluit error.
  11. Xanthippo captus Libycis tolerarat in oris
  12. seruitium Satricus, mox inter praemia regi
  13. Autololum dono datus ob uirtutis honorem.
  14. huic domus et gemini fuerant Sulmone relicti
  15. matris in uberibus nati, Mancinus et una
  16. nomine Rhoeteo Solimus. nam Dardana origo
  17. et Phrygio genus a proauo, qui sceptra secutus
  18. Aeneae claram muris fundauerat urbem
  19. ex sese dictam Solimon. celebrata colonis
  20. mox Italis paulatim attrito nomine Sulmo.