Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. anteibat Latius, melior pietate fideque.
  2. Desiluere caua turbati ad proelia nube,
  3. Mauors Scipiadae metuens, Tritonia Poeno,
  4. aduentuque deum intrepidis ductoribus ambae
  5. contremuere acies. ater, qua pectora flectit
  6. Pallas, Gorgoneo late micat ignis ab ore
  7. sibilaque horrificis torquet serpentibus aegis.
  8. fulgent sanguinei, geminum uibrare cometem
  9. ut credas, oculi, summaque in casside largus
  10. undantis uoluit flammas ad sidera uertex.
  11. at Mauors, moto proturbans aera telo
  12. et clipeo campum inuoluens, Aetnaea Cyclopum
  13. munere fundentem loricam incendia gestat
  14. ac pulsat fulua consurgens aethera crista.
  15. Ductores pugnae intenti, quantumque uicissim
  16. auderent, propius mensi, tamen arma ferentis
  17. sensere aduenisse deos et laetus uterque
  18. spectari superis addebant mentibus iras.
  19. iamque ictu ualido libratam a pectore Poeni
  20. Pallas in oblicum dextra detorserat hastam,