Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. stragem acie sperat. quaeso, cohibete furentem
  2. Varronem: namque hunc fama est impellere signa.
  3. sat magnum hoc miserae fuerit mihi cardine uitae
  4. solamen cauisse meis. nunc ultima, nate,
  5. inuento simul atque amisso redde parenti
  6. oscula.’ sic fatus galeam exuit atque rigentis
  7. inuadit nati tremebundis colla lacertis:
  8. attonito mentis uerbis sanare pudorem
  9. uulneris impressi et telum excusare laborat:
  10. ‘Quis testis nostris, quis conscius adfuit actis?
  11. non nox errorem nigranti condidit umbra?
  12. cur trepidas? da, nate, magis, da iungere pectus.
  13. absoluo pater ipse manum, atque in fine laborum
  14. hac condas oculos dextra, precor.’ at miser imo
  15. pectore suspirans iuuenis non uerba uicesque
  16. adloquio uocemue refert, sed sanguinis atri
  17. sistere festinat cursum laceroque ligare
  18. ocius inlacrimans altum uelamine uulnus.
  19. tandem inter gemitus miserae erupere querelae:
  20. ‘Sicine te nobis, genitor, Fortuna reducit