Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. fraus ulla est. iaceres in me cum feruidus hastam,
  2. Poenus eram. uerum castris elapsus acerbis
  3. ad uos et carae properabam coniugis ora:
  4. hunc rapui exanimi clipeum. sed iam unice nobis
  5. haec fratris tumulis arma excusata reporta.
  6. curarum tibi prima tamen sit, nate, referre
  7. ductori monitus Paulo, producere bellum
  8. nitatur Poenoque neget certamina Martis.
  9. augurio exultat diuum immensamque propinqua
  10. stragem acie sperat. quaeso, cohibete furentem
  11. Varronem: namque hunc fama est impellere signa.
  12. sat magnum hoc miserae fuerit mihi cardine uitae
  13. solamen cauisse meis. nunc ultima, nate,
  14. inuento simul atque amisso redde parenti
  15. oscula.’ sic fatus galeam exuit atque rigentis
  16. inuadit nati tremebundis colla lacertis:
  17. attonito mentis uerbis sanare pudorem
  18. uulneris impressi et telum excusare laborat:
  19. ‘Quis testis nostris, quis conscius adfuit actis?
  20. non nox errorem nigranti condidit umbra?