Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. (heu cur non idem mihi tum!) rogus. ora uidere
  2. postquam est ereptum miserae tua, litore sedit
  3. interdum, stetit interdum, uentosque secuta
  4. infelix oculis magno clamore uocabat
  5. Aenean comitemque tuae se imponere solam
  6. orabat paterere rati. mox turbida anhelum
  7. rettulit in thalamos cursum subitoque tremore
  8. substitit et sacrum timuit tetigisse cubile.
  9. inde amens nunc sideream fulgentis Iuli
  10. effigiem fouet amplexu, nunc tota repente
  11. ad uultus conuersa tuos, ab imagine pendet
  12. conqueriturque tibi et sperat responsa remitti.
  13. non umquam spem ponit amor: iam tecta domumque
  14. deserit et rursus portus furibunda reuisit,
  15. si qui te referant conuerso flamine uenti.
  16. ad magicas etiam fallax atque improba gentis
  17. Massylae leuitas descendere compulit artes.
  18. heu sacri uatum errores! dum numina noctis
  19. eliciunt spondentque nouis medicamina curis,
  20. quod uidi decepta nefas! congessit in atram