Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Suessa atque a duro Frusino haud imbellis aratro.
  2. at, qui Fibreno miscentem flumina Lirim
  3. sulphureum tacitisque uadis ad litora lapsum
  4. accolit, Arpinas, accita pube Venafro
  5. ac Larinatum dextris, socia hispidus arma
  6. commouet atque uiris ingens exhaurit Aquinum.
  7. Tullius aeratas raptabat in agmina turmas,
  8. regia progenies et Tullo sanguis ab alto.
  9. indole pro quanta iuuenis quantumque daturus
  10. Ausoniae populis uentura in saecula ciuem!
  11. ille, super Gangen, super exauditus et Indos,
  12. implebit terras uoce et furialia bella
  13. fulmine compescet linguae nec deinde relinquet
  14. par decus eloquio cuiquam sperare nepotum.
  15. Ecce inter primos Therapnaeo a sanguine Clausi
  16. exultat rapidis Nero non imitabilis ausis.
  17. hunc Amiterna cohors et Bactris nomina ducens
  18. Casperia, hunc Foruli magnaeque Reate dicatum
  19. Caelicolum Matri necnon habitata pruinis
  20. Nursia et a Tetrica comitantur rupe cohortes.