Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ‘Pone grauis curas tormentaque lenta sedendi,
  2. fatalis Latio miles. placauimus iras
  3. caelicolum, redeunt diui: finita maligno
  4. hinc Fabio imperia et mutatos consule fasces
  5. nuntio. nunc dextras mihi quisque atque illa referto
  6. quae Marte exclusus promittere magna solebas.
  7. en, numen patrium spondet maiora peractis.
  8. uellantur signa, ac diua ducente petamus
  9. infaustum Phrygibus Diomedis nomine campum.’
  10. Dumque Arpos tendunt instincti pectora Poeni,
  11. subnixus rapto plebei muneris ostro
  12. saeuit iam rostris Varro ingentique ruinae
  13. festinans aperire locum fata admouet urbi.
  14. atque illi sine luce genus surdumque parentum
  15. nomen, et immodice uibrabat in ore canoro
  16. lingua procax. hinc auctus opes largusque rapinae,
  17. infima dum uulgi fouet oblatratque senatum,
  18. tantum in quassata bellis caput extulit urbe
  19. momentum ut rerum et fati foret arbiter unus,
  20. quo conseruari Latium uictore puderet.