Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. loricae crebro laxata resoluerat ictu,
  2. accepit lateri penitusque in uiscera adegit
  3. extabat fixo quod forte cadauere ferrum.
  4. heu sortem necis! euasit Garamantica tela
  5. Marmaridumque manus, ut inerti cuspide fusus
  6. occideret, telo non in sua uulnera misso.
  7. uoluitur exanimis, turpatque decora iuuenta
  8. ora nouus pallor. membris dimissa solutis
  9. arma fluunt, erratque niger per lumina somnus.
  10. Venerat ad bellum Tyria Sidone, nepotum
  11. excitus prece, et auxilio socia arma ferebat,
  12. Eoa tumidus pharetrati militis ala,
  13. gens Cadmi, Cleadas; fulua cui plurima passim
  14. casside et aurato fulgebat gemma monili,
  15. qualis ubi Oceani renouatus Lucifer unda
  16. laudatur Veneri et certat maioribus astris.
  17. ostro ipse ac sonipes ostro totumque per agmen
  18. purpura Agenoreis saturata micabat aenis.
  19. hic auidum pugnae et tam clarum excidere nomen
  20. Brutum exoptantem, uarie nunc laeuus in orbem,