Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. partitus socias uires, uicina propinquis
  2. signa iugis locat et specula sublimis ab alta
  3. non Romana minus seruat quam Punica castra.
  4. nec mora. disiecto Minuci uecordia uallo
  5. perdendi simul et pereundi ardebat amore.
  6. Quem postquam rapidum uidit procedere castris
  7. hinc Libys, hinc Fabius, simul accendere sagacis
  8. in subitum curas: propere capere arma maniplis
  9. edicit uallique tenet munimine turmas
  10. Ausonius, torquet totas in proelia uires
  11. Poenorum ductor propellitque agmina uoce:
  12. ‘Dum dictator abest, rape, miles, tempora pugnae.
  13. non sperata diu plano certamina campo
  14. offert ecce deus. quando data copia, longum
  15. detergete situm ferro multoque cruore
  16. exsatiate, uiri, plenos rubiginis enses.’
  17. Atque ea Cunctator pensabat ab aggere ualli
  18. perlustrans campos oculis, tantoque periclo
  19. discere, quinam esset Fabius, te, Roma, dolebat.