Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Ticini iuuenem ripis, fususque ruentis
  2. uulnere equi Libycis praebebat colla catenis.
  3. hic ardens exire malis et rumpere uitam,
  4. ‘Non cum Flaminio tibi res, nec feruida Gracchi
  5. in manibus consulta:’ inquit ‘Tirynthia gens est;
  6. quam si fata tuis genuissent, Hannibal, oris,
  7. terrarum imperium Carthaginis arce uideres.
  8. non ego te longa serie per singula ducam.
  9. hoc sat erit: nosces Fabios certamine ab uno.
  10. Veientum populi uiolata pace negabant
  11. acceptare iugum, ac uicino Marte furebat
  12. ad portas bellum, consulque ciebat ad arma.
  13. dilectus uetiti, priuataque castra penates
  14. Herculei impleuere. domo, mirabile, ab una
  15. patricius iunctis exercitus ibat in armis.
  16. ter centum exiluere duces. quocumque liberet
  17. uno non pauidus rexisses bella magistro.
  18. sed dirum egressis omen: Scelerata minaci
  19. stridentis sonitu tremuerunt limina portae,
  20. maximaque Herculei mugiuit numinis ara.