Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ac Methymna ferox lacibus cessere Falernis.
  2. Haec tum uasta dabat terrisque infestus agebat
  3. Hannibal, et sicci stimulabant sanguinis enses,
  4. ludificante ducem Fabio. iamque improba castris
  5. Ausoniis uota et pugnandi praua libido
  6. gliscebat: proni decurrere monte parabant.
  7. Da famae, da, Musa, uirum, cui uincere bina
  8. concessum castra et geminos domitare furores.
  9. ‘Feruida si nobis corda abruptumque putassent
  10. ingenium patres et si clamoribus’ inquit
  11. ‘turbari facilem mentem, non ultima rerum
  12. et deplorati mandassent Martis habenas.
  13. stat pensata diu belli sententia: uincam
  14. seruare inuitos urgentisque ultima fata.
  15. nulli per Fabium e uobis cecidisse licebit.
  16. si lucis piget et supremis esse cupido est
  17. nominis Ausonii taedetque in tempore tali
  18. nullum clade noua claraeque fragore ruinae
  19. insignem fecisse locum, reuocandus ab atris
  20. Flaminius uobis est sedibus. ille ruendi