Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et dulcis tristi repetebat sorte penates
  2. saucius. haud illi comitum super ullus, et atris
  3. uulneribus qui ferret opem: per deuia, fractae
  4. innitens hastae furtoque ereptus opacae
  5. noctis, iter tacitum Perusina ferebat in arua.
  6. hic fessus parui, quaecumque ibi fata darentur,
  7. limina pulsabat tecti, cum membra cubili
  8. euoluens non tarda Marus (uetus ille parentis
  9. miles et haud surda tractarat proelia fama)
  10. procedit renouata focis et paupere Vesta
  11. lumina praetendens. utque ora agnouit et aegrum
  12. uulneribus diris ac, lamentabile uisu,
  13. lapsantis fultum truncata cuspide gressus,
  14. funesti rumore mali iam saucius aures:
  15. ‘Quod scelus, o nimius uitae nimiumque ferendis
  16. aduersis genitus, cerno? te, maxime, uidi,
  17. ductorum, cum captiuo Carthaginis arcem
  18. terreres uultu, crimen culpamque Tonantis,
  19. occidere atque hausi, quem non Sidonia tecta
  20. expulerint euersa meo de corde, dolorem.