Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nec Poenum auertisse satis: dat numine magno
  2. Aeneadis mentem gremio deponere tuto
  3. Romuleam laudem Fabioque salutis habenas
  4. credere ductori. cui postquam tradita belli
  5. iura uidet, Non hunc inquit ‘superauerit unquam
  6. inuidia aut blando popularis gloria fuco,
  7. non astus fallax, non praeda aliusue cupido.
  8. bellandi uetus ac laudum cladumque quieta
  9. mente capax. par ingenium castrisque togaeque.’
  10. sic genitor diuum recipitque ad sidera gressum.
  11. Hic circumspectis nulli deprensus in armis
  12. laudatusque Ioui Fabius mirabile quantum
  13. gaudebat reducem patriae adnumerare reuersus,
  14. duxerat egrediens quam secum in proelia, pubem.
  15. nec membris quisquam natoue pepercit amato
  16. acrius aut uidit socium per bella cruorem
  17. tristior. atque idem, perfusus sanguine uictor
  18. hostili, plenis repetebat moenia castris.
  19. stirpe genus clarum caeloque adfinis origo.