Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. orando et, uultu interdum sine uoce precati,
  2. quod rogitant, audire pauent. hinc fletus, ubi aures
  3. percussae grauiore malo, metus inde, negatum
  4. si scire, et dubius responsi nuntius haesit.
  5. iamque ubi conspectu redeuntum uisa propinquo
  6. corpora, sollicite laeti funduntur et ipsis
  7. oscula uulneribus figunt superosque fatigant.
  8. Hic inter trepidos, curae uenerandus, agebat
  9. Serranum Marus, atque olim post fata mariti
  10. non egressa domum uitato Marcia coetu
  11. et lucem causa natorum passa ruebat
  12. in luctum similem antiquo. turbata repente
  13. agnoscensque Marum ‘Fidei comes inclite magnae,
  14. hunc certe mihi reddis.’ ait ‘leue uulnus? an alte
  15. usque ad nostra ferus penetrauit uiscera mucro?
  16. quicquid id est, dum non uinctum Carthago catenis
  17. abripiat poenaeque instauret monstra paternae,
  18. gratum est, o superi. quotiens heu, nate, petebam,
  19. ne patrias iras animosque in proelia ferres
  20. neu te belligeri stimularet in arma parentis