Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. hinc Fadum petit et ueterem bellare Labicum,
  2. cui Siculis quondam terris congressus Hamilcar
  3. clarum spectato dederat certamine nomen.
  4. immemor annorum seniumque oblitus in arma
  5. ille quidem cruda mente et uiridissimus irae
  6. ibat, sed uani frigentem in Marte senectam
  7. prodebant ictus: stipula crepitabat inani
  8. ignis iners cassamque dabat sine robore flammam.
  9. quem postquam accepit patrio monstrante superbum
  10. armigero Poenum ductor, ‘Certamina primae
  11. hic lue nunc’ inquit ‘pugnae: te notus Hamilcar
  12. hac trahit ad manis dextra.’ tum librat ab aure
  13. intorquens iaculum et uersantem in uulnere sese
  14. transigit. extracta foedauit cuspide sanguis
  15. canitiem et longos finiuit morte labores.
  16. nec minus Herminium primis obtruncat in armis,
  17. adsuetum, Trasimenne, tuos praedantibus hamis
  18. exhaurire lacus patriaeque alimenta senectae
  19. ducere suspenso per stagna iacentia lino.