Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Quae dum turbatos auertunt aequore campi
  2. ductores ualloque tenent, ex agmine Poenum
  3. cedentem consul tumulo speculatus ab alto
  4. atque atram belli castris se condere nubem,
  5. turbidus extemplo trepidantis milite maesto
  6. inuadit cuneos subitoque pauore relaxat
  7. iam rarescentis acies. tum uoce feroci
  8. poscit ecum ac mediae ruit in certamina uallis.
  9. sic ubi torrentem crepitanti grandine nimbum
  10. inlidit terris molitus Iuppiter altas
  11. fulmine nunc Alpes, nunc mixta Ceraunia caelo,
  12. intremuere simul tellus et pontus et aether,
  13. ipsaque commoto quatiuntur Tartara mundo.
  14. incidit attonitis inopino turbine Poenis
  15. haud secus improuisa lues, gelidusque sub ossa
  16. peruasit miseris conspecti consulis horror.
  17. it medius ferroque ruens densissima latum
  18. pandit iter. clamor uario discrimine uocum
  19. fert belli rabiem ad superos et sidera pulsat,